Канад Улсын Торонто хотноо 93 дахь жилдээ зохион байгуулагдсан дэлхийн эрдэс баялгийн хайгуул, олборлолтын хамгийн том чуулга уулзалт болох “PDAC 2025” амжилттай өндөрлөлөө.
Энэхүү олон улсын арга хэмжээний үеэр Монгол Улс албан ёсны үзэсгэлэнгийн талбайг нээж, уул уурхайн салбарын төрийн болон хувийн хэвшлийн төлөөлөл өргөн бүрэлдэхүүнээр оролцлоо. Тэд хамтын ажиллагааг өргөжүүлэн, шинэ түншлэл тогтоож, хөрөнгө оруулалтын боломжуудыг танилцуулсан юм.
Чуулганы хүрээнд Монголын эрдэс баялгийн салбарыг сурталчлан таниулах “Монголын өдөр” арга хэмжээг амжилттай зохион байгуулсан. Тус арга хэмжээнд “Дарханы төмөрлөгийн үйлдвэр” ХХК-ийн Дэд бүтэц борлуулалтын газрын дарга Э.Баттогтох компаниа төлөөлөн оролцож, “Гангийн үйлдвэрлэлийн цогцолбор” төслийн талаархи мэдээллийг хөрөнгө оруулагч нарт танилцууллаа.
“Дарханы төмөрлөгийн үйлдвэр” ХХК-ийн Дэд бүтэц борлуулалтын газрын дарга Э.Баттогтох жилд нэг сая тонн ган бэлдэц, цувимал бүтээгдэхүүн үйлдвэрлэж, дотоодын хэрэгцээг хангах уг төслийн хэрэгжилтийн үе шат, эдийн засгийн ач холбогдол болон ирээдүйн үр өгөөжийн талаар дэлгэрэнгүй мэдээлэл өгсөн юм. Тус төсөл нь Монгол Улсын Засгийн газрын үйл ажиллагааны хөтөлбөрт тусгагдсан бөгөөд уул уурхайн салбарын цаашдын хөгжилд томоохон хувь нэмэр оруулах төсөл юм.
PDAC 2025 чуулга уулзалтад дэлхийн 135 орны 30 мянга орчим төлөөлөгч оролцож, 1100 үзэсгэлэнгийн талбай ажилласан бөгөөд 700 орчим салбарын мэргэжилтэн, экспертүүд дөрвөн өдрийн турш илтгэл тавьж, хэлэлцүүлэг өрнүүллээ. Монголын уул уурхайн салбарын төлөөлөгчид энэ томоохон арга хэмжээнд амжилттай оролцож, олон улсын хөрөнгө оруулагчидтай харилцаагаа өргөжүүллээ.
