“Ашигт малтмалын тухай хууль”-ийн 42-р зүйл, Монгол Улсын Засгийн газрын 179-р тогтоолын дагуу “Дарханы төмөрлөгийн үйлдвэр” ХХК нь байгаль орчныг хамгаалах, уурхай ашиглах, үйлдвэр байгуулахтай холбогдсон дэд бүтцийг хөгжүүлэх, ажлын байр нэмэгдүүлэх чиглэлээр орон нутгийн захиргааны байгууллагуудтай тогтмол хамтран ажилладаг.
Үүний хүрээнд Сэлэнгэ аймгийн Хүдэр сумын ЗДТГ-тай 2011 оноос, Дархан-Уул аймгийн Хонгор сумын ЗДТГ-тай 2009 оноос эхлэн жил бүр хамтын ажиллагааны гэрээг шинэчлэн байгуулж, хэрэгжилтийг ханган ажиллаж байна. 2023-2024 оны хамтын ажиллагааны гэрээний хэрэгжилтийг талууд дүгнэж, биелэлтийг 96%-тайгаар үнэлсэн болно.
Компанийн зүгээс орон нутгийн тогтвортой хөгжил, эдийн засгийн дэмжлэгийн хүрээнд орон нутгийн аж ахуйн нэгж, иргэдээс бараа бүтээгдэхүүн худалдан авах бодлого баримталж, шударга өрсөлдөөний зарчмаар хамтран ажиллахыг нэн тэргүүнд зорьдог.
Мөн орон нутгийн иргэдийн хөдөлмөр эрхлэлтийг дэмжих чиглэлээр мэргэжлийн сургалтад хамруулах, ажлын байраар хангах арга хэмжээг авч хэрэгжүүлж байна. Үүний үр дүнд компанийн нийт ажилтны 16% нь орон нутгийн иргэд бөгөөд тэдний цалин, урамшуулал, нийгмийн хангамж нь орон нутгийн эдийн засагт эерэг нөлөө үзүүлж байна.
Компанийн зүгээс нийгмийн хариуцлагын хүрээнд орон нутгийн тогтвортой хөгжилд хувь нэмэр оруулж, хамтын ажиллагаагаа өргөжүүлэн ажиллах болно.