Монгол Улсын Засгийн газар “Дарханы төмөрлөгийн үйлдвэр” ХХК-ийг түшиглэн жилд 1.0 сая тонноос багагүй ган бүтээгдэхүүн үйлдвэрлэх хүчин чадалтай үйлдвэр байгуулахаар шийдвэрлэсэн.
Энэ хүрээнд Монгол Улсын сайд, Засгийн газрын хэрэг эрхлэх газрын дарга Н.Учрал, Аж үйлдвэр, эрдэс баялгийн сайд Ц.Туваан болон холбогдох албаныхан “Дарханы төмөрлөгийн үйлдвэр” ХХК-ийн үйл ажиллагаа, төслийн бэлтгэл ажилтай танилцав. Тэд төслийн үйл ажиллагааг эрчимжүүлэх, газар зохион байгуулалтын асуудлыг шуурхай шийдвэрлэх, үйлдвэрийг 2028 онд ашиглалтад оруулах чиглэлийг “Дарханы төмөрлөгийн үйлдвэр” ХХК-ийн гүйцэтгэх удирдлагад өглөө.
“Дарханы төмөрлөгийн үйлдвэр” ХХК нь ган боловсруулах үйлдвэрийн төслийн хэрэгжилтийг эрчимжүүлэх хүрээнд холбогдох бэлтгэл ажлуудыг шуурхай гүйцэтгэж, салбарын яам болон бусад төрийн байгууллагуудтай хамтран ажиллаж байна.
Монгол Улсын уул уурхай, хүнд үйлдвэрийн салбарт тэргүүлэх байр суурь эзэлдэг “Дарханы төмөрлөгийн үйлдвэр” ХХК нь гангийн дотоодын үйлдвэрлэлийг нэмэгдүүлэх, импортыг орлох бүтээгдэхүүн үйлдвэрлэх, эдийн засгийн тогтвортой өсөлтөд хувь нэмэр оруулах зорилготойгоор ажиллаж байна.
