Монгол Улсын Засгийн газрын “Алсын хараа 2050”, Шинэ сэргэлтийн бодлогын хүрээнд “Дарханы төмөрлөгийн үйлдвэр” ХХК “Уул уурхай металлургын цогцолбор” төслийг хэрэгжүүлэхээр бэлтгэл ажлыг ханган ажиллаж байгаа билээ. “Уул уурхай металлургын цогцолбор” төсөл нь эх орны төмрийн хүдрээс эцсийн ган цувимал бүтээгдэхүүнийг үйлдвэрлэж дотоодын зах зээлийг хангах зорилготойгоор дэд төслүүд болох “Нойтон баяжуулах үйлдвэр, хорголжийн үйлдвэр”, “Мини шууд ангижруулсан төмрийн үйлдвэр”, “Монгол ган цогцолбор I” төслүүдийг хэрэгжүүлэхээр бэлтгэж эхлээд байна. Төсөл хэрэгжсэнээр үндсэн 2139 ажлын байр шинээр бий болж, салбар дагасан үйлдвэрлэлүүд хөгжиж мөн түүнийг дагасан олон мянган ажлын байр нэмэгдэх юм.

Дэд төслүүдийн эхний үе шатуудын нэг болох 2024- 2028 онд хэрэгжих “Монгол ган цогцолбор – I” төслийн техник эдийн засгийн үндэслэлд дурьдсан тооцоогоор төслийг хэрэгжүүлэхэд 196 инженер, 1438 мэргэжилтэй ажилтан буюу нийт 1634 ажилтан шаардлагатай гэсэн судалгаа гарсан юм. Үүнтэй холбогдуулж эхний ээлжинд 2022 оноос эхлэн ШУТИС-д үйлдвэрийн 16 ажилтныг Металлургийн инженер мэргэжлээр компанийн 100%-ийн тэтгэлэгээр сургаж байна. Мөн Дарханы Төмөрлөгийн Үйлдвэр ХХК-ийн үүсэн байгуулагдсаны 30 жилийн ойг угтан гангийн үйлдвэр, уурхайн инженер техникийн ажилтан, инженер мэргэжлээр сурч байгаа мэргэжлийн ажилтнуудаас бүрдсэн 20 ажилтантай багийг БНХАУ-д металлургийн үйлдвэртэй танилцах, туршлага судлах, мэдлэг, ур чадвараа хөгжүүлэх уулзалт сургалтанд хамруулахаар үдэн явууллаа. Тус инженер техникийн ажилтнууд БНХАУ-ын Гуаньжу хотод болох метал, металлургийн салбарын үзэсгэлэнг үзэж туршлага судлан,  Шанхай хотын металлургийн үйлдвэртэй танилцах юм. “Дарханы төмөрлөгийн үйлдвэр” ХХК-ийн Удирдлага, менежментийн багаас 16 жил тасалдаад байсан гадаадын сургалт, хөгжлийн ажлыг ийнхүү эхлүүлж байгаа төдийгүй юуны түрүүнд дээрх төслүүдэд шаардлагатай ажлын байранд үйлдвэрийн ажилтнуудаасаа мэргэжил дээшлүүлэх, өсөн дэвжиж, дэвшин ажиллуулах бодлогыг баримтлан ажиллаж байна.