Энэтхэг улсын Мумбай хотноо зохион байгуулагдсан “India Steel 2025” олон улсын үзэсгэлэнд “Дарханы төмөрлөгийн үйлдвэр” ХХК Монгол Улсаа төлөөлөн амжилттай оролцлоо. Энэхүү оролцоо нь Монголын гангийн салбарын хөгжлийг дэмжих, олон улсын дэвшилтэт туршлага, технологийн шийдлүүдтэй танилцах чухал боломжийг бүрдүүлэв.
Тус үзэсгэлэнг Энэтхэгийн Гангийн Яам болон Энэтхэгийн Худалдаа, Аж Үйлдвэрийн Танхим (FICCI) хамтран зохион байгуулсан бөгөөд дэлхийн 33 гаруй улсын 300 гаруй компани оролцсон, гангийн салбарын тэргүүлэх арга хэмжээний нэг байв.
Дарханы Төмөрлөгийн Үйлдвэр ХХК нь үзэсгэлэнд оролцох үеэр үйлдвэрийн технологийн шинэчлэл, өртөг зардлыг бууруулах чиглэлээр олон улсын байгууллагуудтай туршлага солилцож, хамтын ажиллагааны боломжуудыг судалсан нь компанийн үр ашгийг нэмэгдүүлэх, тогтвортой хөгжлийг хангахад стратегийн ач холбогдолтой алхам боллоо.
Цаашид тус компани нь дотоодын түүхий эдэд тулгуурласан, нэмүү өртөг шингэсэн, олон улсын зах зээлд өрсөлдөх чадвартай бүтээгдэхүүн үйлдвэрлэх зорилтын хүрээнд технологийн шинэчлэл болон хамтын ажиллагааг эрчимжүүлэн үргэлжлүүлэх бодлоготой байна.
